劉小慧「復出」開fb直播：錢並唔係一切！

退出娛樂圈多年的劉小慧今日孖好友Andy開facebook live介紹特色食肆、中醫穴位及生活好用品，老公蘇志威特別到現場支持，而好友周勵淇及黎瑞恩也有在網上撐場，不過期間小慧卻口快快爆了周勵淇的行蹤，笑指對方身在英國也支持她。

復出幕前？

小慧坦言一個星期前才決定開網上直播：「我個人想做就做。其實我唔鍾意用電腦，連facebook都係粉絲幫我開，不過我覺得需要開拓吓呢方面知識，最實際就係網上世界。我平時用過啲好嘢，我都會介紹畀身邊朋友，佢哋都會好雀躍，所以都想同大家分享吓。（係咪諗住復出幕前？）我冇呢個計劃，我做嘢好隨心，唔想有任何承諾，我做直播冇目的，只係想將我接觸到呢個世界嘅嘢同人分享，當大家都好無私咁同別人分享，咁都係一個正能量，唔一定要捐錢，錢並唔係一切。」

分享中醫療法

至於會否邀請老公及圈中好友亮相？小慧稱下次會在家中直播，屆時老公定必露面，問到會否讓小朋友上鏡？她笑言：「我唔介意，睇佢哋自己意願，不過呢個facebook係我自己，我先係主角，其他人都係路人甲乙丙，佢哋鍾意都可以路過。」小慧表示日後會定期開直播，題目方面，除了食以外，還會分享一些好用的生活用品以及中醫知識：「我以前係睇西醫為主，近幾年學咗中醫。西藥食得多會有副作用，會傷肝同腎，中醫有啲自然療法，好過食化學嘢，我都有教老公同小朋友一啲急救嘅穴位，如果我有事，佢哋都救到我。」