齊坐時光機返童年　王菀之由細到大都冇變過

好多藝人雖然唔係童星出身，但細細個就上過無綫節目，有啲女大十八變，有啲三歲定八十。好似歌手王菀之，唱歌了得大家都知，原來佢9歲時已經代表香港兒童合唱團上過兒童節目，分享參加遊學團嘅感受，9歲嘅王菀之一睇就知係佢，完全冇變過，就連佢講嘢把聲同語氣，同依家都一樣。

而十優港姐麥明詩由細到大都係咁叻，11歲參加咗小太空人訓練計劃，相信大家都仲記得，當年全城熱話係中國第一艘載人飛船「神舟五號」成功返回地面，太空人楊利偉熱爆。當年佢嚟香港時候，11歲嘅麥明詩有份接楊利偉機，仲送花埋對方，好威水。當年嘅麥明詩當然未識打扮，仲整咗個爆炸頭，而且黑黑實實，相對依家靚女好多。

一向係跳舞了得嘅顏卓靈係拉丁舞高手，細個時同partner一齊上節目，佢仲女扮男裝跳拉丁舞，嗰時嘅顏卓靈眼大大好靚女，講起跳舞，佢真係好有心得，喺節目度分享點解鍾意跳拉丁舞，仲介紹森巴舞嘅特別，面對鏡頭一點都唔怯場。

無綫藝人朱敏瀚有1/4英國血統，混血兒特別靚仔，細個仲特別得意，朱敏瀚5歲時就曾經參加過兒童節目入面《仙履奇緣旅程大競賽》仲攞咗「最英俊王子大獎」，睇佢細個真係好靚仔。

網民有話兒：

EilXXX：王菀之把聲一啲都冇變過。

YueXX：朱敏瀚細細個真係好靚仔。

MinX：顏卓靈由細靚到大。

SunXX：麥明詩細個啲頭髮好乾。