《紅海》領兵瘦10磅!林超賢恨攞導演獎補數

2019年04月07日 00:00
東網電視
更多新聞短片
林超賢透露《紅海行動》將會開拍續集!

「魔鬼導演」林超賢憑執導英皇電影《紅海行動》獲本屆金像「最佳導演」提名,他表示對得奬與否抱平常心,但至今仍對當初台前幕後的共同努力心存感激,直言《紅》片續集題材正在發酵醞釀中,蓄勢待發再下一城。

廿年前攞咗半個獎

林超賢執導的《紅》片錄得全球45億2,400萬港元票房,先後獲得多個電影獎項,更令他獲提名「第38屆香港電影金像獎」的「最佳導演」,力戰陳果、陳詠燊、陳小娟和莊文強。談到20年前夥拍陳嘉上執導《野獸刑警》,已曾勇奪該奬,近年他個人亦屢次獲得提名,他坦言:「我成日都話上次只係攞咗半個奬,咁梗係恨攞番個畀自己啦,不過都係平常心,總之入得圍嘅,個個都有機會。」由於已出發到墨西哥拍新片《緊急救援》外景,他笑言要向該片監製爭取,希望屆時能抽空返港出席盛會。

個半月臘腸送飯

對於近年港產題材的電影抬頭,身為一個香港導演去執導一套內地元素的軍事電影,林超賢坦言電影上映期間,不時聽到不同的聲音,難怪他表示倘若屆時自己真的獲奬,會在台上衷心感激所有支持者,以及與他捱苦奮鬥的台前幕後。《紅》片由籌備到完成花了一整年時間,當中最困難莫過於「領兵」:「要帶領一大班人,不時被雜務煩擾,摩洛哥外景嘅生活條件亦好打擊士氣,喺當地我可以話食咗人生中最多嘅白飯同臘腸,情緒試過有波動更瘦咗10磅,係好好嘅試煉。但係接到呢個題材心情興奮嘅,感覺新鮮同埋覺得係挑戰。(再揀一次都會拍?)會,但會揀過外景地方,當初決定去摩洛哥,係因為好多美國軍事電影都去嗰度取景,但後嚟我先發現,人哋只會留一星期,邊好似我咁拍足個幾月!」

試新嘢累積經驗

林超賢明言《紅》片上映前,自己只努力拍好每個鏡頭,完全沒有預測到票房會如此成功。談到不時有消息指會開拍續集,他大方透露:「係有咁嘅事,正在洽談中,接觸同醞釀緊啦,最快會喺明年成事。其實每套電影都會為我累積到一啲得着,好似依家我拍《緊》片都喺度試緊啲新嘢,希望攞到相關實戰經驗,可以令我開拍《紅海2》時更加成熟。」

----------------------------
東網巨星開咗ig喇,大家快啲follow啦!
https://bit.ly/2JjSVcr