艾粒3個原因上紅館　當奴硬食榴槤慘到爆

組合艾粒在紅館舉行尾場演唱會，獲天后容祖兒、蔡卓妍、鍾欣潼、謝安琪及老公張繼聰、陳瀅、方力申、陳嘉寶與老公、湯怡、徐濠縈、Super Girls的Aka、組合HotCha的Crystal及Winkie、阮小儀等人捧場。一開始先播出兩人惡搞的廣告片，之後當奴和反串扮女人的少爺占出場，兩人合唱《羅生門》，當奴表示艾粒上到紅館有幾個原因：「紅館冇歧視，音樂冇分高低，第二係艾粒都係大歌星，但點解TVB嘅《流行經典50年》冇搵我哋嘅？第三係證明香港係有希望，只要鬥長命就得，總有一日上到紅館。」他又多謝容祖兒讓紅館期給他們：「係Joey送我哋上紅館，好似唔要個期畀我哋。」

之後兩人化身戰士又跳又唱，少爺占代表藍色的「靚人會」，當奴代表紅色的「矮人會」，兩人要「激戰」5個回合分出勝負，而第一晚是由當奴勝出，搞到少爺占要食納豆。首先兩人先展開一輪互相攻擊，少爺占攻擊當奴用矮來掩飾年齡，又窒他：「叫佢唔好再操，點操都係半個彭于晏......嘅身高。」當奴就反擊：「佢個樣通街都有，有人話佢似『岡本教主何潤東』、林奕匡、狄以達，我就淨係似一個人，劉以達。」

期間少爺占發覺當奴好像高了，當奴自爆穿了增高鞋墊，全場爆笑，然後他即場除鞋墊出來，少爺占即扔落地下，當奴就除埋另一個鞋墊，少爺占即搭他膊頭笑言：「呢個先係你呀嘛。」經過5個回合，分別是與粉絲合唱、鬥後生、唱歌鬥大聲、唱自選歌曲及唱對方歌曲後，今晚由少爺占勝出，當奴要接受懲罰食討厭的榴槤，他一臉痛苦地食榴槤，場面搞笑。