慳妹謝文欣捱足五年：好想唱主題曲！

27歲「長腿女神」、星夢歌手謝文欣（Ally）早前喺《2018年度勁歌金曲頒獎典禮》獲得最受歡迎新人獎，喺台上失控爆喊，得獎感受更講到好似鬼食泥，被網民大讚夠真性情。Ally之所以情緒如此激動，只因佢等咗足足五年，直至去年先擁有第一首派台歌《其實我牽掛》，佢坦言曾一度感到沮喪：「我當時成日諗點解人有我冇呢，但可能個天安排，我以前廿一歲入行好驚青，但依家我有信心可以好好把握住啲機會。」

喺嗰五年期間收入唔穩定，全靠佢慳得一蚊得一蚊，而且一人打兩份工幫補收入，佢話：「我好少出街因為費事使錢，平時出活動嘅衫都係Sponsor。而且我有做part time化妝師，之前冇job嗰時就開班教人化妝幫補自己，而且同屋企人住開支都細啲。」佢透露曾自己訂下一個deadline，去到30歲「不成功，便成仁」，佢直言：「因為3字頭對一個女仔嚟講係好大嘅轉捩點，如果到時成績仍然如此，我就要好認真諗吓究竟向前行，抑或選擇第二個方向。」

眾所周知，近年聽到嘅無綫電視劇主題曲唔係菊梓喬就係吳若希所演唱，唔少觀眾都大呻聽到厭，Ally借機主動向公司喊話「我都好想唱主題曲」，佢坦言：「我好想achieve到一啲嘢先收手，趁呢個年齡有夢想就去追。其實我最想有一首好多人識嘅歌，都有同公司講過想唱主題曲，由細到大都好鍾意聽電視劇首歌，希望遲啲有機會啦。」

鳴謝：Barry@relaxdearhk

場地：明記潮館