4歲生日！梁浸浸掛住玩懶理Chok爆陳真

藝人鄭希怡（Yumiko）囡囡梁子柔（梁浸浸）4歲生日，每年Yumiko都會悉心為寶貝女大搞生日派對，今年亦唔例外。Yumiko為梁浸浸開彩虹生日P，當中包括容祖兒、蔡卓妍、鍾欣潼（阿嬌）、黃依汶一家、陳小春同囝囝等人出席，場面非常熱鬧。壽星女梁浸浸戴花花髮圈同着上紫色連身裙，打扮十分可愛！佢同黃依汶囝囝陳真合照嗰陣，陳真擺晒Chok樣，但係梁浸浸就掛住玩冇理陳真，仲連鏡頭都冇望添，認真搞笑！

而Yumiko同老公配合彩虹主題色彩大晒繽紛嘅衫，佢哋喺場地上布置唔同顏色嘅氣球，同埋準備咗彩虹蛋糕，歡樂氣氛十足，相信梁浸浸呢個4歲生日過得好盡興啦！