演得好未必攞獎！惠英紅爭女配唔敢太老定

影后級的惠英紅憑電影《翠絲》，獲提名本屆金像獎「最佳女配角」。於戲中演家庭主婦的她，得知丈夫喜歡同性的情緒及內心戲演繹，絕對向難度挑戰。她早前更在亞洲電影大奬中「先拔頭籌」奪女配，實力自然被睇高一線，不過她卻謙稱並非「坐定粒六」：「我對自己好有信心，但頒奬禮視乎評審口味，個個都有機會，演得唔好點入圍？」並自言不會對奬項抱太大期望，皆因以往不時「跌眼鏡」﹕「好似當年《倩女幽魂》，我覺得自己演姥姥好成功，最終入到圍但攞唔到獎。」

讚周家怡有戲

她拒絕評論對手余香凝、周家怡、蔣璐霞及黃璐的演出，但直言最留意周家怡：「香港好少有演員演警察似過我，覺得佢有啲我嘅影子。（即係話你平常心？）又唔係，每次有提名都會緊張，但好似坐低打麻雀咁，點知對手出乜章法？我冇諗定得奬謝詞。」

攤牌戲爆Seed

談到戲中演出，惠英紅與「老公」姜皓文攤牌時，由冷靜到尾段的歇斯底里，爆Seed演技令觀眾留下深刻印象，她對這場戲亦記憶猶新：「佢係個極要面子嘅過氣老倌，寧願同老公喺出面做戲，都要話畀人知有個完整家庭，好彩我都係半個戲劇世家出身，之前跳開中國舞，好明白每位舞者都想有完美演出，要成功迷惑台下所有觀眾。」

至於金像奬當晚的戰衣，原來惠英紅已獲品牌贊助，服飾將由米蘭空運抵港：「我睇相揀咗一套，運到嚟再Fitting。（性感？）呢啲留番畀啲後生啦，高貴成熟路線應該比較適合。」

服裝：PETAR PETROV@Lane Crawford

化妝：諺瞳．小白

髮型：James Lee@HAiR

場地：香港九龍東皇冠假日酒店