操足兩年！吳業坤何廣沛互摸胸肌

歌手吳業坤為下周五假紅館的《吳業坤小句號演唱會2019》排舞，見他大騷麒麟臂，身形很fit，問他對身形收貨未？他笑言：「收貨啦，做咗兩年gym，健身教練都滿意，我都覺得自己幾變態，拍劇嗰陣會同何廣沛攞起件衫互相摸對方啲腹肌，研究點操得勁啲，好似突然變咗真男人咁玩肌肉。」

想影相留念

問到可有為自己影相留念？他表示：「有呀，做完gym會影，會對比番，紀錄下自己有啲改變。（會唔會想出寫真？）都想，見阿田（田蕊妮）影得咁正，佢40歲影，我都想30歲整番輯。」問到演唱會可會騷肌？他表示：「都會架啦，呢啲例行公事，依家都係食得清淡，同埋呢排忙拍劇、練歌同練歌，都已經消耗好多體能，係29年嚟最佳狀態。（你依家幾舊腹肌？）隱若都見到六舊架。」

身體接觸女dancer

但講到跳舞舞步簡單，坤坤表示：「其實唔係好多時間排舞時間，同埋啲舞都係可愛啲嘅感覺，我啲歌唔係勁歌熱舞，着重氣氛多啲。（少時間練？）都係，所以要抽空練。」但講到他跳舞時與女舞蹈員沒有接觸，問到是否不敢摸她們？他笑言：「都係，因為第一次喺咁多人面前跳，同埋咁齊dancer，平時都係我自己一個練多，等熟絡啲先啦，因為首歌係講追女仔，有啲身體接觸都需要。」

想摸dancer pat pat

問到是否抽空都不「抽水」？他笑言：「梗係唔敢，係以舞會友，不過到時佢哋會摸我心口同喺我胯下跨過，都幾大膽架，希望大家睇到我嘅誠意。」問到到時可會有辣身舞？他笑言：「其實頭先想摸pat pat，但未夠熟落唔到手，有啲嘢可以玩下，但唔係意淫，係funny啲嘅感覺，希望大家唔好覺得我似性騷擾。」