玉帛相見　朱晨麗沖涼何廣沛做緊乜…

藝人朱晨麗及何廣沛在電視城參加新劇《大醬園》拜神儀式，講到朱朱之前拍劇受傷，她表示：「係呀！所以要小心啲，今次呢套劇有幕同龔嘉欣一齊搬缸，佢又整親手指尾，所以我哋兩個受傷嘅人就輕手啲，導演都錫住我地。（唔影響拍攝？）So Far都OK。」她又表示劇入面都有動作場面，因飾演古代速遞員，要踩三輪車，之後又會做「豉油妹」。問可擔心又會再受傷？她說：「佢哋錫住我，都會喺安全範圍下做。」問何廣沛可有肉赤朱朱？他表示不擔心：「佢拍過《特技人》，都係半個特技人，佢仲要踩三輪車，我坐後面。（會唔會照顧朱朱？）都會。」

朱朱睇過廣沛身材

講到兩人在劇入面飾演歡喜冤家，朱朱自爆太入戲：「有時編審都話我可以唔使咁惡。」廣沛大呻：「佢將啲私人恩怨發洩喺我身上，次次拍親劇都對我好惡。（咁佢真人係咪咁惡？）真人好優雅，香港小姐冠軍。」朱朱則踢爆廣沛會在劇入面大騷身材：「有一幕佢喺房入面半裸上身，我就喺出面個窗度『裝』佢。」

問兩人可會有親熱場面？朱朱說：「有一幕係我沖涼，佢就喺度游水，劇情係大家都赤裸嘅，都好尷尬，唔知到時會點拍。」廣沛表示會怕醜，朱朱說：「我唔怕醜，我都有睇《3日2夜》睇過佢嘅身材。」