一家輸三家！王菀之爭成千銀麻雀數

歌手王菀之（Ivana）除咗唱得，近年演喜劇都有一手，佢喺社交網上載一張寫滿連串數字嘅紙，又有爸、媽、奶字，佢留言：「麻雀枱東南偏南嘅一角，寫咗我今日嘅日記（圖）。對住呢三位長老，與其話我孝順，不如誠實啲講其實佢哋已經手下留情。。。打到西圈櫃桶仔已經好似我食唔飽個肚咁空，要用到記帳。 打完之後爸爸仲贈我一句：『你以後唔洗（使）籌碼啦，帶筆得㗎喇！ 」我：#呢度可能係成世人輸得最開心嘅地方#其實我已經着粉紅色衫無奈幫唔到」，原來係佢欠下嘅麻雀數，睇完真係笑爆嘴，一家輸三家，加埋輸咗差唔多成千蚊，好多網民留言笑佢當交學費，又笑佢一家養活三家，更有人笑言王爸爸冇講錯喎！