東方日報C1：英皇掃12獎成金像大贏家
20190416
東網電視
更多新聞短片
英皇戲勢勁，在金像獎頒獎禮上狂掃12個獎項。
英皇電影於今屆金像獎氣勢強勁，狂擸12個獎項成為大贏家，其中單計《無雙》及《紅海行動》已一口氣掃10個獎！女星蔡卓妍（阿Sa）雖然失落影后，但收到逾千短訊力撐，當中好姊妹容祖兒及鍾欣潼各出奇謀博紅顏一笑，認真友情可貴！
「第38屆香港電影金像獎頒獎典禮」前晚圓滿落幕，英皇電影狂掃獎項，當中由莊文強執導、周潤發及郭富城等主演的《無雙》，榮獲最佳電影、最佳導演、最佳編劇、最佳攝影、最佳剪接、最佳美術指導、最佳服裝造型設計共七獎；林超賢執導的《紅海行動》贏得最佳動作設計、最佳音響效果及最佳視覺效果三獎；旗下藝人惠英紅憑《翠絲》封最佳女配角；黃秋生三度封金像影帝，英皇連擸12個獎，在頒獎禮威到盡，成為終極大贏家！
慶功宴滿場嘉賓
老闆楊受成當然飲得杯落，賽後拉大隊出席公司與兩間電影公司及金像獎合辦的慶功宴，除了英皇藝人外，亦吸引大批藝人捧場，包括出爐男配角袁富華、32位新世代嘉賓司儀、有份角逐獎項的周家怡、胡定欣、潘燦良與女友蘇玉華等，場面非常熱鬧。
失落影后的阿Sa席上滿場飛，相當風騷，更展示大將之風。談到對手時，她表示賽前已看過入圍作品，直指曾美慧孜的角色難掌握，同時亦很喜歡張靜初的《無》片，所以早已認為自己勝算不大，輸獎亦未感失望：「我覺得《三夫》套戲唔止係睇尺度，佢真係演得好好。靜初都演得好好，就算對手係周潤發同郭富城，佢都可以喺裏面突圍而出，係非常困難，仲要佢個角色出場唔多，但已經令人難忘。」問到男友石恆聰可有安慰？她說：「唔需要，場內收唔到電話，完場後收到幾百個Message，大多數都係容祖兒、關智斌同阿嬌（鍾欣潼），佢哋一路睇住電視同我打氣，好搞笑！好感恩一路以來都有好多好錫我嘅朋友，有好嘅際遇，相信之後上天一路會畀好多機會我。」
阿Sa昨日接受電話訪問時表示：「淨係手機短訊都200幾個， 後來再睇埋網上留言幾百個，加埋真係有成千個Message，真係好感動！」而其經理人霍汶希受訪時，表示會繼續為阿Sa嚴選好劇本及題材好的電影，又說：「英皇最多唔係珠寶，而係影帝、影后，其實楊生都好支持阿Sa，希望佢早日踏上影后之路！我就覺得影后條路好漫長，可以慢慢嚟，佢之前都完成咗幾部戲，今年會陸續同觀眾見面。」
惠英紅恨大滿貫
至於惠英紅慶功宴上直言賽前有信心，但同時擔心評審心態：「驚佢哋會覺得『又係你呀？』不過我都覺得係公平公正，其實賽果我差唔多估中晒，係冇揀自己會贏啫！」談到今年非常旺，她透露稍後亦有連串工作，幸好期間可以休息10天充電。對於曾揚言支持新進導演，她笑指有收利是當片酬，問到之後是否向視后及舞台劇進發？她說：「我希望做到聲勢，攞埋就真係人生大滿貫！睇吓得唔得啦， 因為舞台劇係可一不可再。」
曾美慧孜慶功咀導演
憑電影《三夫》第四度封后的曾美慧孜（小美），前晚興奮得連踩兩場慶功，還拗腰拍照。她受訪時坦言心情仍然激動，回想上台領獎時笑說：「當時腦海一片空白，準備了的說話也忘了，只能說出最有印象的說話，雙腿緊張到顫抖，走去後台腳也一直抖，眼淚一直流，實在太沒出色了，相比拍戲時更緊張！」她感激金像獎給予鼓勵，承諾會繼續做好演員本分，自覺未算是好演員，期望向負責頒獎的三位影后惠英紅、毛舜筠及鮑起靜學習。對於憑首部主演作品榮升影后，小美坦言有少許壓力，問到會如何慶祝？她說：「今日是陳果導演生日，所以親了他一下，以及唱生日歌。自己會跟媽媽吃飯，最想吃叉燒包和小籠包。」
至於余香凝提名三獎均落空， 提到台上不慎露乳貼，她說：「其實條裙好Fit、好緊，不過我未試過戴耳機着呢條裙，可能好緊張，抖氣太大力，不過都只係露貼紙，好在有黐，否則就好尷尬！下次會再準備好啲。」
栢芝戥謝賢捧獎開心
張栢芝前晚以一身亮麗打扮現身「新加坡紅星大獎2019頒獎盛典」，並擔任壓軸嘉賓頒發「十大最受歡迎男女藝人」獎。事有湊巧，謝賢與劉曉慶前晚分別在金像獎及美國休斯敦國際電影節獲頒「終身成就獎」，栢芝笑說：「真的很開心，很多朋友、合作過的前輩都獲獎， 每一位前輩都實至名歸，替他們開心，祝福他們！」
毛舜筠逆齡省鏡激似胡定欣
藝人毛舜筠（毛毛）昨日出席協康會活動，她前晚在金像獎的造型獲讚年輕了10歲，更有人誤認她為胡定欣，她笑說：「咁似定欣就唔止後生咗10年，要多謝化妝師同髮型師。」對於同公司的阿Sa失落影后，她讚對方是用心的演員，繼續努力他日一定會成功。
至於定欣失落「最佳新演員」，前晚在慶功宴上表示未感失望：「冇諗過可以成為座上一分子，仲要有得提名，對我嚟講已經好難忘。最難忘係行紅地氈，因為落雨，條裙有一半濕晒！」提到戲中對手吳鎮宇缺席頒獎禮，她坦言感可惜：「我第一部劇就係同鎮宇合作，第一套電影又係同佢合作，佢係我恩人。」
楊千嬅開騷怕觸電
歌手楊千嬅日前在珠海舉行《MY BEAUTIFUL LIVE 世界巡迴演唱會》，吸引約25,000觀眾捧場，好姊妹谷祖琳、林兆霞及陳逸寧亦專程支持。由於在戶外體育場開騷，而當日滂沱大雨兼有雷暴警告， 她一度擔心不已，幸而開騷前10分鐘天公作美：「最擔心係冒雨唱歌有觸電危險，因為之前試過畀咪電到手，又驚觀眾要淋濕身睇騷！」坦言停雨後開心得大聲叫。
當晚她穿上一條價值約9萬的靚裙獻唱《小星星》，期間全場觀眾亮起手機燈打造星海，令她感動流淚，笑說：「咁樣好難搞喎！有冇人可以畀張紙巾我呀！」尾聲又因不捨而落淚。
此外，千嬅前晚在金像獎頒獎禮獲2002年電影《新紮師妹》男友吳彥祖「尋親」，並大讚「前女友方麗娟」Keep得好，千嬅上載合照，坦言想再合作：「開心驚喜是遇見了『舊情人』歐海文。」
吳鎮宇頒獎禮冇影去唱K
藝人吳鎮宇憑電影《逆流大叔》提名金像獎最佳男主角，惟前晚未有出席盛事，反而去了唱K！昨日微博流傳他在北京唱K的照片，相中見他與大班朋友玩得開心，還Chok甫自拍。據知他身在當地趕拍新片，故未能趕返港參加盛事，莫非早已打定輸數，料到未能得獎？
更多新聞，請瀏覽東方日報網頁：