小儀做「狗仔隊」　金剛被跟蹤激動爆粗

藝人阮小儀同金剛向來係最佳拍檔，佢哋合作嘅節目《街坊廚神》系列大受歡迎，加開多輯之餘，更帶挈二人拍住上參演劇集《愛情食物鏈》及《降魔的》，不過近年金剛將重心放番喺台灣，少咗喺香港出現，搞到老友都好掛住佢！

尋日金剛「快閃」來港，小儀得知消息後即刻去佢蒲開嘅地方「野生捕獲」，佢喺社交網晒出合照，留言：「知你今日來今晚走，又畀我知道你一定喺邊度出沒，wakakaka...飲杯嘢傾個計（偈）見個面先啦！Bye la...希望下次台灣見！」金剛睇到之後激動爆粗笑指小儀跟蹤佢，而小儀就笑言因為自己帶埋愛犬出街，所以係「狗仔隊」咁話。