雙雙出軌?黃心穎許志安被爆的士偷情

2019年04月16日 13:00
東網電視
更多新聞短片
黃心穎許志安被爆背另一半出軌!

無綫小花黃心穎驚被爆背男友馬國明,與「人夫」許志安喺的士車廂中偷情,片段更流出!片段開頭見安仔、心穎和男友人坐在車廂後座,男友人堅持先送心穎返屋企,而本來戴上黑色口罩嘅心穎疑似爆粗反對,似乎有啲醉意!

安仔都支持心穎先送男友人返屋企,一面冧爆嘅心穎搣咗安仔耳朵一下,疑再向男友人爆粗安仔即叫司機開車往大坑,跟住又翹實安仔左臂,兩人又不時摸手仔,心穎更除下口罩多次向對方獻吻!

未幾,男友人抵埗落車後,安仔同心穎異口同聲向司機表示:「鯉魚門(心穎住址)」!最後淨番兩人嘅時間,心穎立即隔住口罩咀咗安仔一啖,10秒後仲索性除口罩攬住安仔咀嘴,表現非常主動。

雖然由大坑到鯉魚門10多分鐘車程,但兩人連環激咀逾20次,心穎猴擒攬住錫許志安高達15次,在熱情攻陷下安仔再做主動錫錫9次,當中兩人不乏十指緊扣,又摸吓大髀,十分㷫合合!而較為被動嘅安仔期間愈坐愈低,似乎擔心被隔籬駛過嘅車發現。

睇番兩人衣着,同心穎喺IG今個月3日上載嘅照片一樣,兩人當晚係同方力申、劉浩龍、梁漢文、丁子高等食飯。。

據知情人士透露,馬國明身邊好友多次力勸他與黃心穎分手,惟男方一往情深,直至車廂攬啜事件曝光後,馬國明終於心死斬纜!