黃心穎晨早入屋有預謀？7日前仲讚Sammi好型

許志安背妻偷食黃心穎一事震撼全城，兩個睇落大纜都扯唔埋嘅人流出車廂纏綿影片，令網友大呼驚訝，心穎BB火速被翻出同男方一家嘅「關係」，原來佢唔單止同許志安「同車」，仲試過同佢老婆鄭秀文（Sammi）「同框」，Friend到齊齊做Gym，唔知係咪早就入屋，有所準備！

Sammi早於上年11月就於社交Instagram（Ig）上載同心穎BB健身嘅影片，似乎對女方毫無戒心，影低對方健身一幕，仲留言讚佢動作標準，而心穎BB都有留言回應，讚Sammi勤力唔休息，一來一往留言，似乎已經幾好感情！至於去到今年1月，心穎BB於Ig上載同健身室大班老友，包括許志安慶祝自己30歲生日嘅大合照，眼見老公同心穎BB笑晒合照嘅Sammi仍然大方留言賀對方生日，更讚佢似20歲多啲，唔少網友於社交網瘋傳心穎BB呢堆入屋證據，紛紛熱議！而最爆就係，心穎BB被發現7日前仲於Ig讚Sammi嘅皮褸造型好有型，網民話佢咁關注同關心Sammi，真係好「有心」！

至於「偷食」事件曝光後心穎BB已立即停止Ig留言功能，家姐黃心美就遭殃，慘被大批網友一窩鋒到了其Ig戶口留言，作出對妹妹品行和性格的負面留言。