內地放寬合拍片政策　楊受成讚係好事

英皇集團主席楊受成博士出席「香港國際創客節2019」開幕儀式，席間其兒子楊政龍，及謝霆鋒於論壇上演講，他笑言是特意來支持二人。談到楊政龍做生意的表現，楊受成讚口不絕：「佢好努力，乖嘅，但缺乏咗少少經驗，同埋有時遲到，為人父母者永遠唔會滿意嘅，所以我畀佢80分。」

談到內地宣布放寬合拍片政策，意味本港電影人將有更多的創作空間及自由，楊受成表示：「睇咗新聞喇，放寬咗5樣嘢包括演員quota，聽日我哋都有個訪京團，我會參加，但唔知同呢件事有冇關係，但點都係好事，即係以後好似申請批文咁會容易好多，但意識形態上我會繼續尊重內地電影局等機構。」楊受成還指因以往有限制內地演員要達一定百分比，今次放寬尤其對女演員有幫助，因女演員「好慘」，通常電影由男主角「擔戲」，責任很重，女演員就幾乎誰都可以，對票房影響不大，很多電影都選不到香港女演員，放寬後，香港女演員就會有較多機會，而內地元素上的放寬亦可能對低成本電影有幫助。

談到旗下藝人蔡卓妍失落金像獎影后，楊受成坦言：「我失望㗎，佢豁達過我，反過嚟安慰我添，我相信佢遲早都會係影后。佢咁後生，大把機會嘅，公司對佢都會有啲計畫。」此外，英皇今年於金像獎揚威，共奪十二個獎項，他的旗下藝人奪影帝，在台上公開多謝楊受成對他作出經濟上的支持，令他可不收片酬拍戲而無後顧之憂，終於好心有好報獲得影帝，還打趣道：「大家千祈唔好學我，唔係個個（背後）都有個楊老闆（楊受成）！」楊受成對此表示：「我有幫佢，公司每一位同事，無論藝人或員工，遇到困難我都唔會托手㬹，個個都幫。（對方攞咗獎有冇嗌加價？）佢並唔係恨錢嘅人，追求嘅係滿足感，好難得為理想拍戲。」