袁偉豪恨揸槍　楊明盼赴哥國落地生根

藝人袁偉豪（Ben）及楊明現身機場，準備出發哥倫比亞拍攝節目《打工捱世界III》，此行將拍攝18日，二人透露女友張寶兒及莊思明都有送他們到機場，但就沒有現身見記者，兩人笑言她們是「賓賓寶兒」及「賓賓Lisa」。

楊明透露帶了兩個雪櫃及食物出發，因為怕熱帶雨林冇啖好食，Ben則帶吉篋準備大手入貨咖啡豆，講到女友張寶兒擔心他踩地雷，Ben笑說：「邊隻地雷先？爆嗰隻定係金金（糞便）？（驚治安差？）監製本色，鍾意虐待藝人，去啲好原始嘅地方，我哋又鍾意被虐，聽聞最厲害嘅罪犯已經唔喺度，放出嚟都做咗第二行，不過我哋會去礦洞，離市區三粒鐘，希望有槍揸手，安全啲。（化身《鐵探》垶Sir？）想有嘢揸手啫！其實着避彈衣都冇用。」

女友指示唔准太曳

楊明笑言或會考慮在當地落地生根，搞生意賣中餐，他又指女友思明叫他不要太曳，問到是哪種曳？他笑說：「唔好同Ben再周圍去跑步！」Ben說：「上次去印度我哋跑步，見到好多拖住手嘅男人望住晒，驚佢哋對我哋有興趣。」

Ben最近打防疫針後發高燒，因此昨日缺席劇集宣傳，楊明透露吃了瘧疾藥物後亦想作嘔，Ben說：「可能老咗，我哋上次食呢類藥都冇用，今次要食到返香港，可能要睡覺前食。」他們又透露此行要打工做礦工採綠寶石，Ben做足球評述員，楊明賣雪糕，而最筍工是兩人做獵頭公司訓練模特兒及在街上發掘靚女。