黃柏高為許志安求情:唔想佢一鋪清袋

2019年04月16日 21:29
東網電視
更多新聞短片
黃柏高幫許志安求情。

歌手許志安(安仔)經理人黃柏高(Paco)在安仔記者會後發聲明,表示今日從北京返港一落機,即收到安仔電話,就其酒醉及不當行為道歉,深明犯下嚴重過錯,表示希望暫停手上所有工作,深切反省。Paco指對方作為公眾人物,要為自己行為負責,即時暫停其所有工作。

Paco接受東網電話訪問,透露安仔向他承認犯錯,並鼓勵安仔出來開記者招待會認錯,同太太鄭秀文(Sammi)、家人講句對唔住。Paco表示作為安仔經理人和朋友,相信安仔真誠道歉,而且現時聲譽受損和這一刻暫停其所有工作,已經是最大懲罰。由於安仔九月的演唱會籌備需時,是否取消?他說:「要衡量過所有嘢先,希望大家原諒佢,佢一次犯錯,一時糊塗,希望唔好判佢死刑,過往佢都做咗唔少公益事,都唔想佢一鋪清袋。」

至於太太Sammi原諒咗安仔未?Paco說:「佢一定有同Sammi交代,係咪可以表態原諒佢,未知,努力在了解中,呢一刻答唔到你。(擔不擔心佢哋會離婚?)以今時今日社會角度嚟睇……片中女方採取主動……,當然呢樣嘢唔可以賴晒人,始終都係安仔一時糊塗,一時蒙蔽,希望大家畀次機會佢,希望Sammi都畀一次機會佢。」