暫時停工!許志安爆喊道歉:我係醜惡嘅人
許志安與黃心穎爆出車廂啜爆一事,安仔作為人夫犯下「偷食」彌天大錯,晚上七時由經理人黃柏高陪同下在酒店舉行記招交代事件,身穿黑衫的他眼紅紅現身,先向台下向現場過百傳媒躬鞠5秒,然後步伐緩慢行去咪牌前坐低。
他先深呼吸,隨即哽咽,耷低頭爆喊:「首先就今日記者會目的係好想親口同大家講對唔住,為家人、Sammi家人、朋友、錫我嘅人致萬二分歉意。自己做咗一件不可彌補、不被原諒嘅事,呢個錯誤深深咁樣去反思自己,我係一個醜惡嘅人。」然後索一下鼻水,喊住續講:「今日來到呢度承擔我嘅責任。我個晚的確飲咗好多好多酒,但飲醉酒絕對唔係藉口犯呢啲咁錯嘅事,我好後悔,好難面對同接受唔到自己。」
認衰色心起
說到此處安仔繼續講:「睇到報道後,我覺得自己好丟臉、好錯、好討厭、好嘔心、好陌生,我有深刻反思,點解唔可以控制自己去犯呢個錯誤、起咗呢個色心。我覺得承擔這個責任要分兩個部分,第一由依家開始暫停所有工作,直至搵番真正嘅自己同正確嘅自己,去重新檢視自己學做人。第二,心靈上,覺得自己不知所謂,因為我嘅錯誤同行為,令身邊所有愛錫我嘅人,承受一種咁大嘅壓力同痛苦,我希望喺嚟緊嘅日子,所有被我整傷過、整痛過嘅人都可以好好。」
他表示:「呢個報道令我深刻反思,其實我最錯嘅地方係迷失咗自己,最後我要再次同所有愛我嘅人講,令到你哋難堪,我做錯咗,對唔住。同埋對唔住Sammi。」安仔講完呢句,好似說不下去,停頓了10秒後,先至再續講:「唔知以後點去走自己嘅路,我呢刻冇咗靈魂,我係一個壞咗嘅人,希望大家可以畀時間我搵返自己。最後再一次同所有朋友講聲對唔住。」然後離開講台,再次躬鞠10秒道歉,期間記者問他問題,如Sammi可有原諒他?演唱會可會取消等問題,他都沒有回答就走了。
上到車繼續喊
安仔於記者會完畢後,即由工作人員包圍下匆匆離開,上車後他仍難掩悲痛,繼續低頭激動狂哭,之後乘七人車直返回淺水灣與太太的愛巢。之後,安仔於社交網留言:「最後作為一個丈夫,我要向Sammi說對不起,這是一個徹頭徹尾的錯誤,我感到慚愧及痛心。請大家給予時間和空間我去學習怎樣去改過及重新去做一個人。」