天雨路滑　鍾健威獅隧避開車禍

藝人黃心穎同許志安嘅車廂短片爆出成為熱話，連藝人鍾健威（Ray）都抽水，發文指自己都有一條好震撼嘅車Cam片，原來因為佢險炒車！佢喺社交網甫出一段行車記錄片段，見佢前面嘅七人車突然急停車，好彩佢及時收油兼扭呔，先成功避免意外發生。

佢留言交代事件：「獅子山隧道落斜出九龍塘，眼見再前一架大巴着左尾燈，突然急剎仲跣埋呔，我都醒水收緊油……點知都跣埋一份！Dup到盡都向七人車跣埋去，即時扭呔已經諗住自炒！好在好在一扭到埋路邊無咁跣即刻停咗，無損無爛！更好在我有保持兩秒幾嘅行車距離！少一米我都應該……」佢又提醒各位司機天雨路滑時要多加留神，小心駕駛。