有問候許志安 蘇永康望兩公婆攜手度過難關

2019年04月17日 19:43
東網電視
更多新聞短片
蘇永康接受訪問時有備而來。

藝人蘇永康晚上現身電視城為節目《流行經典50年》進行錄影,與許志安(安仔)份屬好友的他有備而來,提前接受記者訪問,甫開始即謂:「馬國明頭先答得好有智慧呀,我哋呢啲塘邊鶴仲有乜好講?(有睇直播?)有,如果唔係邊敢出嚟見你哋,我好認同佢嘅講法。除咗幾位當事人之外,其他人真係唔應該多講,咁安仔出嚟交代咗啦,心穎亦都上咗社交網站,依家我淨係想件事盡快平息,唔好再發酵落去。」

留空間畀安仔兩夫婦

被問到有否與安仔聯絡時,蘇永康坦言:「作為朋友梗係有關心啦。(佢情緒點樣?)咁當然心情唔會好,我希望大家留啲空間畀佢哋兩夫婦,我同哋兩個係30年嘅朋友,最想係佢哋可以手拖手度過呢一個難關。」

問有否聯絡鄭秀文及擔心她的情緖?蘇永康表示:「呢啲嘢交番畀女人做,尋日件事冒緊煙嘅時候,我有同我老婆講叫佢幫吓手,不過事後我冇時間再問佢。(Sammi返咗娘家住?)唔清楚。(對安仔失望?)佢錯就係錯咗,我只想件事盡快平息,唔想再有人受傷害。」

遇過飛來蜢

當被問有否遇過異性投懷送抱時,他即謂:「幾十歲人,咁大個一定有啦!不過我係第二段婚姻,所以我好了解究竟係乜嘢一回事,況且我哋有小朋友呀嘛,我同我太太嘅目標就係教好佢,而且我哋之間嘅互信好足夠。(多啲時間陪安仔?)多啲時間陪吓我個仔就真。」