許志安叫咪小器 馬國明:唔會祝福你哋
許志安同黃心穎偷情一事全城熱爆,繼《昨遲人》MV後,有網友摷番原來許志安同馬國明喺劇集《肥田囍事》又一齊合作過,網上流傳咗劇中嘅片段,兩人爭女嘅對話更係十分應景,夠晒啜核!
許志安飾演嘅戴喜同馬國明飾演嘅麥家輝為爭胡杏兒嗌交,其中一幕兩人喺洗手間上演,安仔首先講:「希望你衷心祝福我哋。」馬國明即堅決表示:「我係唔會祝福你哋㗎!」安仔忍唔住謂:「做男人何必咁小器呢?」馬國明唔認輸謂:「佢心入面最掛住嗰個都係我!」
到大結局時,馬國明更大鬧教堂,阻止安仔同胡杏兒結婚,馬國明鬧爆安仔:「對愛情拖泥帶水,唔得一心一意!」仲話同杏兒先係perfect match,之後許志安使出一招KO馬國明,就係大騷手臂上「I love 肥田」嘅紋身,令馬國明冇聲出,只能講句:「我衷心祝福你哋,白頭到老。」安仔就展現勝利笑容。
此情此景,真係應景到爆,唔少網友睇到笑爆嘴之餘,又戥馬國明心噏,真係慘情!