Like黃心穎道歉文 森美被網民洗版鬧爆盲撐

2019年04月19日 14:32
東網電視
更多新聞短片
森美Like咗黃心穎個道歉Post,畀網民鬧爆!

藝人黃心穎與許志安爆出車廂偷情事件,日前黃心穎於社交網發文道歉,但就有大批網民繼續圍插,而留言支持佢嘅好友亦無一幸免,包括藝人黎國輝(阿感)等都照樣被鬧爆,同黃心穎合作節目《森美旅行團》嘅森美都受到牽連!

事關森美Like咗黃心穎個道歉Post,大批網友留意到之後,立即到森美嘅社交網洗版式留言表示失望,指「你同佢如果係朋友就更應該教佢分對錯,唔係盲撐!」、「有些錯是不應該原諒的,你身為人夫應該懂分對錯,將心比己」、「老實講見到你個like有啲驚訝,然後係失望」,更有網友指要罷睇森美嘅節目。

森美回覆東網說:「因為佢做錯嘢就應該要出嚟道歉,我覺得係一件啱嘅事,就係咁咋!」對於有人有唔同嘅推斷,佢又表示理解:「因為佢哋係極度之傷痛,所以我完全明白佢哋嘅誤會,我都希望佢哋明白啦。」講到網民反應,森美說:「我好明白佢哋嘅痛心,嗰種痛心係會……一個偶像唔舒服,就算傷風咁,樂迷感覺猶如自己大病,所以fans嘅痛可以想像得到!(驚唔驚佢哋罷睇你嘅節目?)唔介意,我冇喺佢嘅社交網裏面同佢哋對答,或者解釋個原因,我真係明白佢哋嗰種痛心,我亦都唔想講多錯多,以免佢哋誤會,如果你哋(傳媒)問到,透過你哋話番畀佢哋聽,我都講清楚點解我會like,希望佢哋明白。」