【娛場】依然鴨王！何浩文：係一個成就

如果有關「雞」嘅電影即時令你諗起《金雞》系列嘅女主角吳君如嘅話，咁「鴨」嘅電影嚟講，就會諗起拍《鴨王》系列嘅何浩文（Dominic）啦！出道嗰陣佢係男子跳唱組合Bro5（兄弟伍）嘅成員，但佢喺組合時期唔太順利，仲試過喺澳門做十場騷之後連一蚊都收唔到！依家入行接近十年嘅佢，仍然感激有Bro5：「我都想工作嘅時候撞到其他前成員，始終大家喺同一個起步點出發，但係唔主動聯絡啦！畢竟依家大家做嘅嘢都唔同。」

單飛之後，何浩文先後拍過《喜愛夜蒲II》、《微交少女》等作品，不過2015年《鴨王》先至畀觀眾認得：「上一個成就我認為真係《鴨王》，因為到咗依家，觀眾除咗叫我其他角色名之外，仍然有人叫我做鴨王。」雖然喺舊公司有代表作，但佢完咗合約就冇續約：「離開舊公司主因係彼此方向唔同，佢地會靠關係去爭取曝光機會，咁都唔係錯，但係我主張努力嘅話有一日會成功。」

感情方面，Dominic經歷過糖妹黃山怡同唐紫瓊兩段情之後，2018年宣佈撻着同公司師妹方敏婷（Natalie）。佢仲表示雖然唔介意女朋友願意同佢捱世界，但係就怕女朋友要為佢而捱。即刻睇今集《娛場》，了解何浩文除咗曬肌肉做「鴨王」之外嘅心路歷程啦！