又點錯相！區永權被認錯做李潤庭

藝人好多時都會被點錯，被認錯做另一位藝人。區永權今日46歲生日，佢喺社交網上載咗一張截圖，原來喺網上輸入佢喺名字，維基百科嘅版面會出現咗曾經因婚內出軌而被無綫雪藏嘅藝人李潤庭（Eric），真係唔知好嬲定好笑，區永權發文表示：「哈哈！維基百科⋯搞邊科！多謝徐生（徐繼宗）送我呢個生日『開心大發現』，下次見到Eric，我會打算同佢一齊即場玩變臉，一齊交換個樣樣！」徐繼宗亦有發文表示：「唔講唔知，原來區永權已經變左（咗）李潤庭個樣，生日連樣都變埋真厲害！生日快樂兄弟！」

不過唔緊要，區永權獲兩個仔仔唱生日歌為佢慶生，點知個仔唱到：「 happy birthday to albert...」而唔係用Daddy稱呼，搞到區永權都話：「Albert.?.....呢個係我朋友。」