咬住安心唔放！梁裕恆抽水講陰謀論

落選港男梁裕恆（Flow）連日嚟喺社交網發文力撐黃心穎，受到網民圍攻！今日佢再發功，親自拍片解構「安心偷食」事件，令件事變得更陰謀論。

Flow向網民發問咗唔少問題，要大家去思考，尋求真相。佢話「安心」呢個關係已經有兩年，唔係當晚醉後亂性，又設咗唔少問題。例如「安心」落樓，樓下咁多的士，點解會揀中嗰架的士；而正常的士車cam影嘅喺左邊，而今次車cam一早就放咗喺右手邊對住許志安嚟影；點解咁知名嘅人士喺車度會做啲咁嘅嘢；又反問發生事後經濟上最大得益者係邊個？邊個受人同情？

佢又指件事並唔係簡單嘅桃色事件，許志安開記者會，將件事變性愛關係，而佢哋嘅關係已發生一段時間；又話馬國明出嚟講嘢態度好似形容緊第三者嘅事，又指鄭秀文係咪真係可以第日就可以原諒佢老公？

Flow在喺社交網留言：「斷送了前途，但問心無愧！真心膠」、「如大家仍要針對人，不針對事，我沒辦法！」但網民睇完依家唔buy佢，鬧佢將事件繼續發酵。