【啪啪聲】「細龍太」陳偉琪摑爆享樂團

2019年04月26日 00:00
東網電視
更多新聞短片
陳偉琪化身「細龍太」摑享樂團。

性感打扮的陳偉琪日前拍攝樂隊享樂團MV,期間「細龍太」上身,大巴大巴摑爆享樂團成員,盡顯巴渣野蠻一面!事後她直呼好爽,又遺憾一開始摑得未夠大力!

藝人陳偉琪(Vicky)日前獲樂隊享樂團邀請,為《一巴掌男友》MV擔任女主角,她以吊帶低胸裙上陣,更貫徹《愛‧回家之開心速遞》中「細龍太」的巴渣形象,輪流掌摑四位成員,啪啪聲打到他們面容扭曲!不過有辣有唔辣,主音旨呈捱摑後獲補償,可以與Vicky近距離接觸,共舞擺出經典「亂世佳人」甫士,更親吻女方額頭,艷福不淺!

唔怕嚇走追求者

問到摑得爽不爽?Vicky笑說:「好爽,愈摑愈爽!第一個有啲遺憾,未夠大力!(有冇將之前拍拖嘅怨氣發洩喺佢哋身上?)我又冇乜怨氣嘅。」講到「細龍太」潑婦形象深入民心,現時又演野蠻女友,她卻自爆現實性格剛好相反,溫柔又體貼:「真係唔知點解成日扮惡人!我唔識鬧交,如果鬧交我會走,可能發洩出嚟會好啲,始終有份愛喺度,但我又唔識呢樣嘢,寧願走咗去。(成日演巴渣野蠻角色,驚唔驚嚇走男仔?)唔驚,咁都嚇走,唔值得我要啦!」

四位成員坦言被摑到很痛,旨呈笑言有腫痛的感覺,成員Samuel自爆現實中亦曾被女友兜巴星:「去朋友屋企打邊爐,當時現任發現前度Send Message嚟,有個誤會,所以好嬲咁摑我,我呆咗咁企喺度,之後分手收場。」談及Vicky打扮性感,問他們可有尷尬?他們紛紛笑說:「唔知望邊,要避開同埋盡量撳住!」同場還有EO2成員Eric擔任跳舞導師,大讚四男有天分。