偷食事件後未曾見人　黃心穎被發現已飛LA

藝人黃心穎自從被爆背男友馬國明姣溝人夫許志安，在車廂對安仔主動送吻，又攬又啜，遭全城網民插爆，雖然她曾在網上公開道歉，但似乎無補於事，演藝工作全面叫停，演出的劇集被抽起，甚至主持的舊節目同樣被要求cut，曾被影到在家中痛哭、呆滯兼無助，之前一直有傳她會返加拿大靜思己過，不過今晨她被發現避走美國！

事隔10日，有人目睹黃心穎在洛杉磯機場現身，穿着黑色衞衣、戴上cap帽的她孭住背囊，身邊有一名女友人陪伴，她似乎好驚被人認出，將cap帽拉到好低，當發現有記者，更是行快兩步，一直頭耷耷的她被問到會唔會同男友道歉？還是轉機返加拿大探家人？驚唔驚事業玩完？同馬國明依家咩關係？她全部都冇回應，只係急步而行走到的士站等車離去。

而東網向馬國明問及心穎出走一事，佢只回覆：「冇回應……多謝關心……」無綫高層樂易玲則表示：「我哋之前同佢講過，想佢休息一排先，佢今次係有正式請假嘅！」