莊思敏39歲生日　孖妹爭住送吻勁熱鬧

藝人莊思敏（Jacquelin）今日39歲生日，尋晚佢搞咗個生日派對，邀請多位好朋友出席，當然唔少得喺網上分享派對相啦！當中除咗佢兩位好妹妹莊思明、莊思華外，仲有舊日合作無綫節目《姊妹淘》嘅好拍檔包括吳若希、葉翠翠、王子涵、白雲、林盛斌、黃百鳴、翟威廉等，場面認真熱鬧。

眾人預備咗一個2層高嘅銀紙蛋糕畀壽星女，相當精緻，寓意Jacquelin賺得更多，其中一張相思明同思華仲向家姐送吻，有咁多位好友同佢慶生，Jacquelin一定過得好難忘喇。

Jacquelin今日就同友人飛去越南旅行，問到生日願望，Jacquelin表示：「希望身體健康，工作上有突破。」今年佢成為仁濟之星，所以佢呼籲朋友唔好買禮物，以免浪費，改為捐錢去仁濟，更定咗一萬八千元呢個目標，尋晚已經達標，有一萬九千元！

佢又大讚今年收到嘅生日蛋糕都好有心思：「思明訂做咗個好多錢嘅生日蛋糕，因為佢知我掛住搵錢，佢希望我可以搵多啲錢，佢又幫我做埋大會司儀，好多謝佢。有朋友做咗我同我隻狗個樣嘅蛋糕，又有個J字蛋糕，同發光嘅星球嘅蛋糕。最開心係見到平時好少見嘅朋友都有嚟，除咗秀惠（楊秀惠）因為唔喺香港嚟唔到之外，一班拍《姊妹淘》嘅好姊妹葉翠翠、吳若希同王子涵都嚟咗，好似係《姊妹淘》嘅Reunion咁。」