與鮑起靜演母女 田蕊妮憶亡母:喊咗好多次

20190502
東網電視
更多新聞短片
田蕊妮為送給亡母的新歌《最親》拍MV。
「視后」田蕊妮(阿田)拍攝送給亡母的新歌《最親》MV,更碌人情卡請「影后」鮑起靜飾演其媽媽,MV中尾段時,阿田挨在鮑起靜的膊頭享受母女溫馨一刻時,鮑起靜面露不捨之情跟阿田說:「女呀!我已經準備好啦。」阿田表情瞬間由喜變悲,眼紅紅地望住鮑起靜說:「但我仲未準備好喎。」原來此對白非虛構,阿田受訪時表示:「其實呢段說話,係媽媽喺醫院病重時,佢同我講過嘅。」大派洋葱。問到拍攝此鏡頭時可有爆喊?她謂:「都拍咗八次,但唔係因為情緒問題,而係因為燈光、角度要重拍,不過我拍MV時,諗起媽媽,都喊咗好多次。」
談及阿田的患癌母親去世二年多,問可已放下媽媽?她堅決說:「我唔會放低佢㗎,因為媽咪永遠同我一齊,我有佢嘅基因,今次拍番呢段同媽咪嘅對話,係想分享畀大家知,唔好嫌媽媽好長氣、好煩,喺媽媽眼中,個女無論幾多歲,永遠都係細路女,要珍惜同至親一齊嘅時間。」
阿田說和鮑起靜曾在亞視合作多年,但她從未有機會做鮑起靜的「囡囡」,故今次拍MV就膽粗粗親自邀請,她說:「打電話畀鮑姐時佢唔係香港,但好多謝佢一口答應,即時同我度期,請鮑姐唔可以用錢衡量,所以我親手揀咗條披肩送畀佢。」問和鮑起靜可有難忘的點滴?阿田最記得初入亞視做演員時,鮑起靜指她個樣「出事」:「當時佢同我講:『阿女呀!拍電視要入屋,所以啲妝清清哋最靚』,嗰個年代好興濱崎步嘛,所以我學佢成日化得誇,大大Pat眼影,諗番都好嘔,聽完鮑姐咁講,我二十幾年嚟,拍劇時都只化淡妝,除非劇情需要化艷妝。」