張敬軒一早知Kenny被狂迷纏身:恐怖過我

2019年05月09日 19:00
東網電視
更多新聞短片
軒仔都話無奈…

「獎王」張敬軒(軒仔)今日獲頒兩張金唱片成績,得獎唱片分別是《Dahlia II》及《Senses Inherited》,並即場宣布打破多項紀錄,成績驕人!英皇娛樂集團行政總裁許佩斯為慶祝軒仔獲獎,特意送上一大盒光酥餅作神秘禮物,好讓軒仔兌現之前跟Fans許下隨碟附送光酥餅的惡搞承諾,十分爆笑!

自掏腰包印製限量水晶唱片

軒仔更宣布自掏腰包印製全球限量5隻的《Senses Inherited》水晶唱片,並指稍後會公開拍賣,不扣取成本全數捐贈到慈善機構,以答謝一直支持他的歌迷及回饋社會。問到水晶唱片的製作費用?他表示暫時未知總造價,但單計一隻成本約過萬,認真揼本:「做慈善拍賣個起拍點會低啲,希望有個好價錢。今年預計都會出兩隻碟,就算幾想做網絡紅人,但始終我都係歌手。」

自嘲「火龍果」紅過自己

講到最近多了一個「火龍果」化身,惡搞好友容祖兒新歌MV,他笑稱已被對方「懲罰」:「佢叫我『妖孽』,仲當面摵咗我幾吓。(佢話你犧牲好大,冇晒底線。)唔緊要啦!(驚被分身搶去光環?)都係我嚟,依家多人識『火龍果』、『降兩度』多過張敬軒添,主要都係想多啲人認識自己,近幾年唱片銷量都有增加。」可會以「火龍果」身份現身祖兒演唱會擔任嘉賓?軒仔抵死笑話都可以:「氹吓佢先,但佢好煩,未紅先驕,扮晒嘢!點都好都係想帶歡樂畀大家。」續表示最近跟一班平均年齡24歲的年輕人打造新網上平台,主力sell創意,希望能創造新就業機會。

知Kenny被狂迷硬闖住所樓下

至於講到好友關智斌(Kenny)遭女Fans硬闖住所樓下,曾收Fans的頭髮作禮物的軒仔,坦言分別有聽對方及公司同事提及過:「知咗好耐,仲恐怖過我!我嗰啲都係送禮,但佢係撳佢鐘仔,好得人驚!聽番嚟係個Fans撳晒全幢嘅鐘,如果開咗門畀佢就大件事,直接敲佢門,我有建議過佢報警,同事都Cap晒圖放上網。」又透露已有證據控告該名Fans恐嚇:「佢話唔見佢就會食藥!我覺得同歌迷建立一個良好嘅互動係好,但唔好過分地將藝人生活透過自己想像力融入自己世界,其實都好骨痹,出街都唔知有冇人望住自己,以我所知呢件事已經發生過好幾次,仲曾經喺Kenny屋企樓下等7、8個鐘,身邊都有人被狂迷困擾,但如果佢冇實際嘅傷害,報警都拉唔到佢,都係就咁備案,呢啲都係做Artist嘅無奈地方。」