拍拖2年冇認過!言承旭前女友親述分手原因

2019年05月10日 11:10
東網電視
更多新聞短片
女仔話自己單身,男仔就唔知喇…

台灣男星言承旭嘅感情世界,一直都同女神林志玲個名拉上關係,雖然二人兜兜轉轉17年,但其實言承旭生命中亦有過其他人出現,就好似2014年曾傳緋聞嘅台灣名模、「台版千頌伊」張熙恩咁,原來空穴來風未必無因,尋日張熙恩現身活動時,就大方直認二人曾拍拖,更親述分手原因!

直認曾拍拖2年

2015年時曾被拍到同遊美國嘅言承旭,當時就話女方係佢「非常非常重要的朋友」,不過都係冇公開承認過女友嘅身份。事隔4年,36歲嘅張熙恩就罕有地重提二人嘅戀情,佢坦言雙方拍拖2年多,當時男方受傷,佢就陪伴對方走過低潮,雖然曾傳出二人婚訊,不過佢澄清自己從未被求婚過,甚至試過自卑心作祟:「我有很多疑問,是不是我不夠成功、不夠紅,是我不夠好所以不能承認我?」不過後來佢發現只係言承旭為人比較低調。

親述分手原因

講到二人拍拖時嘅過程,佢就狂讚言承旭係好男友:「這種男朋友很好,沒管我,我可以一直做自己要學的事。」兩個人幾乎都冇嗌過交,惜大家聚少離多,加上佢希望擁有一段可以「大方拖手」嘅感情,二人終和平分手。不過分咗手都唔係各行各路,二人一直保持聯絡,關係仲昇華到好似屋企人一樣,而佢早前搞畫展,言承旭都偷偷出錢託人買畫,令張熙恩直呼感動!