拍拖2年冇认过！言承旭前女友亲述分手原因

台湾男星言承旭嘅感情世界，一直都同女神林志玲个名拉上关系，虽然二人兜兜转转17年，但其实言承旭生命中亦有过其他人出现，就好似2014年曾传绯闻嘅台湾名模、“台版千颂伊”张熙恩咁，原来空穴来风未必无因，寻日张熙恩现身活动时，就大方直认二人曾拍拖，更亲述分手原因！

直认曾拍拖2年

2015年时曾被拍到同游美国嘅言承旭，当时就话女方系佢“非常非常重要的朋友”，不过都系冇公开承认过女友嘅身份。事隔4年，36岁嘅张熙恩就罕有地重提二人嘅恋情，佢坦言双方拍拖2年多，当时男方受伤，佢就陪伴对方走过低潮，虽然曾传出二人婚讯，不过佢澄清自己从未被求婚过，甚至试过自卑心作祟：“我有很多疑问，是不是我不够成功、不够红，是我不够好所以不能承认我？”不过后来佢发现只系言承旭为人比较低调。

亲述分手原因

讲到二人拍拖时嘅过程，佢就狂赞言承旭系好男友：“这种男朋友很好，没管我，我可以一直做自己要学的事。”两个人几乎都冇嗌过交，惜大家聚少离多，加上佢希望拥有一段可以“大方拖手”嘅感情，二人终和平分手。不过分咗手都唔系各行各路，二人一直保持联络，关系仲升华到好似屋企人一样，而佢早前搞画展，言承旭都偷偷出钱托人买画，令张熙恩直呼感动！