康城變中國城 《延禧》宮女行紅氈賴死唔走

2019年05月15日 09:45
東網電視
更多新聞短片
真係冇眼睇.........

《第72屆康城電影節》正式開幕,每年個焦點都唔係落喺獎項度,而係落咗喺紅地氈嘅中國奀星度!今年都唔例外,一眾內地女星繼續以騎呢服裝騎劫康城紅地氈!咁都不單只,仲要被工作人員驅趕都賴死唔走,唔單止英美法記者震驚,連一眾內地網民都大呻真丟架!呢位名叫施予斐嘅內地女星,服裝都算正正常常,不過佢嘅行為就令內地網民大鬧「丟人丟到國外了」,佢叉腰企喺紅地氈上面,然後大會工作人員上前交涉,點知施予斐趕都唔走,其後被網民起底,以為係中國網紅,點知原來拍過上年熱爆古裝劇《延禧攻略》,喺入面飾演高貴妃嘅大丫鬟。

「中國製造」驚現紅氈

一名不知名大陸奀星穿上拖尾唐裝衫配鴛鴦襪,最「搶鏡」係佢拎住寫住「中國製造」嘅扇,成功吸引老外鏡頭,另類揚威海外!除此之外,例牌仲有一啲不知名中國大媽扮少女,同埋心口開大窿谷胸搶鏡嘅中國網紅,認真嚇鬼死人。其實點解會咁多不知名人士能夠踏上康城紅地氈?據知康城電影節嘅門票已成為一門生意,形成一條成熟嘅產業鏈,一張門票由十幾萬至三十幾萬人民幣不等,幾十萬人民幣可以令人「蜚聲國際」,值得!

施予斐發文否認

事後施予斐喺微博發文解釋事件,指當時因為太過激動同緊張,加上現場環境太嘈雜,只聽到外國媒體朋友熱情地叫佢影相,聽唔到工作人員嘅說話,所以先喺現場稍作停留,否認「賴死唔走」嘅指控,並指唔清楚有否被驅逐。