康城变中国城　《延禧》宫女行红毡赖死唔走

《第72届康城电影节》正式开幕，每年个焦点都唔系落喺奖项度，而系落咗喺红地毡嘅中国奀星度！今年都唔例外，一众内地女星继续以骑呢服装骑劫康城红地毡！咁都不单只，仲要被工作人员驱赶都赖死唔走，唔单止英美法记者震惊，连一众内地网民都大呻真丢架！呢位名叫施予斐嘅内地女星，服装都算正正常常，不过佢嘅行为就令内地网民大闹“丢人丢到国外了”，佢叉腰企喺红地毡上面，然后大会工作人员上前交涉，点知施予斐赶都唔走，其后被网民起底，以为系中国网红，点知原来拍过上年热爆古装剧《延禧攻略》，喺入面饰演高贵妃嘅大丫鬟。

“中国制造”惊现红毡

一名不知名大陆奀星穿上拖尾唐装衫配鸳鸯袜，最“抢镜”系佢拎住写住“中国制造”嘅扇，成功吸引老外镜头，另类扬威海外！除此之外，例牌仲有一啲不知名中国大妈扮少女，同埋心口开大窿谷胸抢镜嘅中国网红，认真吓鬼死人。其实点解会咁多不知名人士能够踏上康城红地毡？据知康城电影节嘅门票已成为一门生意，形成一条成熟嘅产业链，一张门票由十几万至三十几万人民币不等，几十万人民币可以令人“蜚声国际”，值得！

施予斐发文否认

事后施予斐喺微博发文解释事件，指当时因为太过激动同紧张，加上现场环境太嘈杂，只听到外国媒体朋友热情地叫佢影相，听唔到工作人员嘅说话，所以先喺现场稍作停留，否认“赖死唔走”嘅指控，并指唔清楚有否被驱逐。