男友係「狐人隊」點算?陳山聰有計幫你拆

2019年05月16日 19:00
東網電視
更多新聞短片
夏天陣陣狐仙味,真係難頂呀!

大家有冇發覺身邊嗰個原來係「狐人隊」隊員呢?呢集《拆彈》網民Mandy就發覺男朋友有臭狐問題,真係幾難頂,到底陳山聰點幫Mandy解決呢個問題呢?

網民Mandy:「我同男友喺冬天相識,當時冇察覺佢有臭狐,但到咗夏天就出事,點樣可以婉轉咁同佢講,叫佢去根治而又唔會傷到佢嘅自尊心呢?」

陳山聰:「其實臭狐呢個問題好多人都有,咁首先睇吓你男朋友有幾愛你,都睇吓你有幾愛你男友,如果兩個溝通得好嘅話,我覺得無須婉轉同佢講,你直接同佢講,或者你首先買份禮物畀佢,就係一啲香薰噴胳勒底嘅止汗劑,買啲靚啲嘅,唔好買啲寫住止汗劑嗰啲,(佢問)『你唔送香水﹖』(你話)『夏天吖嘛,你咁多汗味,畀同事聞到就唔好啦,係咪先?』呢個就夠婉轉。直接啲同佢講:『喂,你真係有臭狐喎,係咪應該要諗諗辦法搞搞佢呢﹖』

「其實我覺得有陣時,我哋都會有啦,我有汗味或者鼻鼾,我女朋友都會話:『喂!你好大聲!』咁樣囉,梗係啦,既然兩個人喺埋一齊,係咪應該要直接啲,唔好咁大家收埋收埋,如果你愛你男朋友,你男朋友係愛你嘅話,我覺得佢唔會介意囉!」