錢錢錢！關楚耀剝剩底褲要睇經濟效益

歌手關楚耀出席品牌活動，但活動場地環境侷促，身穿外套的他滿頭大汗，他表示之前在內地拍劇都試過咁熱：「記得有次喺中山，我係飾演幫派嘅小嘍囉，懶型咁着晒皮褸皮褲，要跑同打，喺戶外、室內都有拍，但室內最甘，因為仲有打燈、攝影師傅，不過我當收身。（有冇試過中暑？）so far未試過，最緊要飲多啲水。」

他亦表示最近早上都有去打波和游水：「因為夏天就嚟到，都會應客戶要求影啲健康性感相，做定準備功夫。」問到他的底線是甚麼？三角內褲得唔得？他笑言：「呢啲唔興啦。」隨即扯開話題表示日前與JW（王灝兒）到英國開騷：「好開心好多學生特登嚟捧場，但佢哋係咁叫我除衫。（有冇徇眾要求？）倫敦凍架，我話嚟緊我會喺香港開騷，叫佢哋嚟睇，我會準備一下。」講到之前杜德偉開騷除淨三角底褲？他笑言：「Fashion嘅嘢佢贏。（你底線淨係騷下body？）都係。（如果酬勞高你會唔會考慮？）咦，可以傾吓，睇藝術角度同經濟效益。」