東方日報C1:肥仔聰老婆早產血崩誕1.9磅B女

2019年05月17日 03:33
東網電視
更多新聞短片
命懸 一線!

已育有一子的藝人林子聰(肥仔聰)今年再做老竇,但今次經歷一場死裏逃生,其太太早產兼血崩,一度停止心跳,囡囡出世不足2磅,需全身插喉搶救,兩母女曾命懸一線!太太脫離危險期,甦醒後第一件事便問女兒情況,還用盡力氣擠出初乳給BB,盡顯母愛偉大!重提險痛失妻女,肥仔聰猶有餘悸,直言明白太太及子女在身邊已是一種很大的福氣!

憑周星馳電影《少林足球》六師弟「輕功水上飄」一角殺入娛圈的林子聰,近年演員、導演雙線發展,曾為大收34億人民幣票房的《美人魚》擔任執行導演。2012年婚後育有一子林奕滔、現年3歲,去年太太Christy再懷孕佗B女,原本是開心事,怎料卻令肥仔聰差點痛失兩至親!

日前接受訪問時,他猶有餘悸,憶述當日兩母女命懸一線的經過:「其實今胎都知比較麻煩,產檢Check到佢有『植入性胎盤』,生嘅時候有機會大量出血。今年1月啱啱佗咗6個幾月,嗰日太太話有啲痛,但覺得冇乜問題,不過我一聽就覺得唔對路,即刻叫白車,一上車BB就出咗嚟,太太不停出血,個救護員都嚇咗一跳,即刻大叫開車。」

媽媽曾停心跳 需切除子宮

甫到醫院即送入急症室,由於太太失血太多,需輸11包血搶救,心臟更一度停頓1分鐘,至於BB出生時僅得1.9磅,由於器官未完全發育,需要全身插喉急救,並輸了3包血,母女情況一度極之危殆,在7位醫生急救下,太太搶救5小時,並需切除子宮才脫離危險期,BB則要插喉及住保溫箱保命。

手術後,從死亡邊緣逃出來的Christy張開眼第一時間就問B女情況,並用僅餘的氣力擠出3毫升初乳給囡囡,還跟肥仔聰說擔心女兒不夠奶吃,完全體現母愛偉大。肥仔聰當時即安慰太太:「呢啲非常珍貴,B女一定夠用。」

整個搶救過程中,肥仔聰一直保持冷靜,但回家後即崩潰嚎哭:「返到屋企真係失控,因為當時救護員都講,稍為遲咗送兩母女入院,後果不堪設想,我應該會冇咗佢哋,真係好難接受!當時深深覺得老婆喺屋企、瞓喺自己隔籬,原來係一種福氣。」

囡囡腦出血 留院3個月

事後,肥仔聰停工照顧妻女,太太住院10日,囡囡則住了3個月醫院,期間他更與囡囡過完一關又一關:「個女喺醫院期間試過腦出血,亦曾經腹脹飲唔到奶,原本要開刀將營養液注入腸道,但我當然唔希望佢受呢啲苦,我不停握住佢嘅小手講:『女呀,乖乖哋食嘢啦!』佢好似聽到咁,真係慢慢又可以食番。」

BB今年4月出院,在兩夫婦照顧及哥哥陪伴下,現已有10磅重,可算雨過天青,肥仔聰亦稍為鬆一口氣:「個女英文名叫Charmaine,花名叫波波,因為依家好似一個波咁圓碌碌!」

差點痛失妻女的肥仔聰,更一度患上心理創傷症,幸已逐漸康復。他坦言很感激當日在救護車為他太太搶救及接生的救護員,以及醫院醫護人員的悉心照顧。他亦很想提醒各位懷孕的媽媽要細心做產檢,若有問題可以及早發現及醫治。

更多新聞,請瀏覽東方日報網頁:
https://orientaldaily.on.cc/