見到阿Sa想嘔 林峯:由年頭對到年尾!

2019年05月17日 15:08
東網電視
更多新聞短片
有晒默契啦!

林峯、蔡卓妍(阿Sa)、方中信主演的網劇《PTU機動部隊》正於「黃Viu煲劇平台」熱播,首次飾演着制服的PTU警員,林峯說:「第一次着住紀律部隊嘅制服,感覺真係唔容易,因為裝備非常之重,尤其係我哋每日着住對boots,又好多追逐戲,拍完之後,令我更佩服佢哋!今次係一次好好嘅經驗,可以感受警務人員嘅日常辛苦;着起套制服,成個人仲挺過着古裝,因為好自然就會有一種責任感、正義感。」

事隔五年再拍港劇

自電影《翡翠明珠》後,事隔八年再與阿Sa演情侶,林峯笑言「對到嘔」:「舊年可以話對住阿Sa對到嘔,因為舊年又同佢拍咗另一部電影,真係年頭對到年尾!其實好開心,因為同阿Sa已經相識多年,私底下好熟、好有默契,每次同佢拍攝都好開心。」相隔五年再演港劇,他不但未有生疏,更表示不消幾天已全程投入:「成個製作都喺香港拍攝,見到好多前輩演員,亦有曾合作嘅台前幕後,感覺製作團隊好快已經一條心,我哋基本上埋位幾日,就已經清楚自己要做咩,拍攝過程雖然辛苦,但亦非常開心。」

談及最難忘的場面,他就大賣關子:「嘩,都有好多難忘場面,劇入面有好多單元、好多唔同案件,我哋將機動部隊嘅日常濃縮30集入面,觀眾會睇到套劇有好多事發生,好多唔同人物、唔同嘅線同時進行,所以係套節奏明快嘅電視劇,觀感上亦可以畀到你好大衝擊!」

希望大家有共鳴

「PTU」系列珠玉在前,作為演員的林峯認為無須比較:「我哋每次做一個作品,先唔好諗住去比較,作為一個演員,好希望拍出嚟嘅,除咗畀所有觀眾睇之外,觀眾入面亦有我哋飾演嘅角色(警務人員),希望佢哋睇到嘅時候會產生共鳴,會覺得:『咦,好真實喎!點解我哋啲細節嘢,你哋都知嘅?』因為我哋做過好多research,亦都得到PTU協助,希望做出一個真實而又有戲劇性嘅網劇畀大家。」