首次做女一!高海寧因一句話勁開心

2019年05月17日 15:25
東網電視
更多新聞短片
高海寧表情勁開心。

藝人高海寧(高Ling)今日現身電台宣傳無綫熱播劇《婚姻合伙人》,首次擔正做女一的她興奮謂,劇集播出4集已經有好回響:「返公司做訪問,監製同好多人都話好好笑,擔正做女主角都好緊張,自己都出力宣傳,瞓身做專訪。(有叫身邊朋友睇?)有呀!都有朋友Cap圖Send畀我,但唔敢狂Send訊息畀人,驚佢哋Block咗我。(你自己都有追?)日日都追!我同啲觀眾一樣冇睇過片。」

高Ling表示最近收到一個讚美說話非常開心:「話以前睇高Ling做戲,會知高Ling係做梗呢個角色,但今次睇咗幾集就覺得唔係高Ling嚟,係貝競枝(劇中角色),好入戲。」

問到現實中跟劇中地產經紀角色一樣成日睇樓盤?她打趣話:「買唔起!依家供緊一層,都想再買樓。覺得今次個角色好得意,佢人生好複雜,但又唔似得表面咁貪錢同自私,好多人話睇到我畀爸爸拋棄嗰集好感人,之後爸爸會返嚟搞搞陣。(現實中貪錢?)我鍾意賺錢,但錢唔係第一位,最緊要係屋企人、健康,不過都要畀心機搵錢,如果唔係都畀唔到好嘅生活環境佢哋,而媽媽教嘅投資心得都係買磚頭。」