搣甩負評王!蔡思貝興奮話似踏出新一步

2019年05月17日 18:03
東網電視
更多新聞短片
蔡思貝於劇集《鐵探》內表現獲網民激讚。

藝人蔡思貝晒腳現身電台接受鄭裕玲(嘟姐)主持的節目訪問,笑言有少少緊張:「平時喺公司見到嘟姐係好恭敬,今次可以真正同佢交流,聽吓佢對我嘅Comment。」續指私下有同好姊妹陳凱琳提議過重拍《神勇雙妹嘜》現代版:「係嘟姐同張曼玉做嘅,係搞笑片,我都未試過拍笑片,係新嘗試,不過我平時喺朋友圈都係做下靶位畀人笑騎呢。」

講到網民激讚她於無綫劇集《鐵探》內的表現,思貝謙虛謂一直都有下苦工努力學習,希望每個角色都做到最好:「好感恩呢套劇有發揮空間,多謝編劇幫咗呢個角色好多,令觀眾有深刻嘅感覺,當初接觸呢套劇都好興奮,事前都做好功課,有睇到啲Comment話好鍾意都好開心。(《鐵》係你最鍾意嘅劇集?)我套套都鍾意,哈哈!」

思貝興奮指終於「搣甩」負評王封號:「見到好多正面Comment,就好似踏出新一步咁,自己都好緊張網民嘅意見,初入行全部接納唔識分類都入得幾深,依家識過濾Handle。」提到於新劇《機動部隊2019》又再次飾演警察角色,問到不怕被定型?她大笑自爆下部戲亦是飾演臥底:「都會想挑戰其他角色,但再做警察都冇所謂,可以將前兩套嘅經驗套用落去。」

剛於中東旅行回港的她透露是個時裝之旅,更是自2013年參選港姐後首次請假去旅行:「同咗個Fashion Blogger去影靚相,半玩半做嘢咗兩個星期,雖然過程好攰,但可以住透明帳篷睇星星好開心。」