林峯去咗康城？內地主持被認錯場面好尷尬

一年一度嘅康城影展現正舉行，唔少華人都湧到當地諗住旅遊兼睇吓明星，呢日一間餐廳外有大量途人圍觀，原來係有人見到「林峯」喺入面開餐，唔少人都上前求合照，呢位林峯好大方來者不拒，不過當途人細心啲睇清楚，發現原來認錯人後，即時全部四散場面好尷尬！

而呢位「林峯」其實係湖南電視台主持名叫魏巍（KK），佢坦言已經習慣咗上述嘅場面，因為喺街上都經常有人認錯佢係林峯，所以佢對途人四散嘅場面都冇晒感覺。而佢本身係做開經濟節目同娛樂無關，佢為咗探討近年網紅嘅威力，仲自資拍咗部大爆網紅秘密嘅電影《艾特所有人》，今次去康城主要係想了解為何咁多人就算畀幾十萬都要行康城紅地氈嘅心態。