咖啡杯後再有水樽!《權力遊戲》結局再穿崩

2019年05月20日 16:38
東網電視
更多新聞短片
之前有咖啡杯,今集結局再有水樽!

萬眾期待的HBO神劇《權力遊戲》(Game of Thrones)香港時間今早播出大結局,即係第8季第6集,雖然集集成本都高達千萬美元,今季仲有最後一季令粉絲勁期待,不過繼早前一集被粉絲發現古代場景驚現現代連鎖店咖啡杯,大大個穿崩位之後,今早的大結局竟然再次穿崩,被眼利網友發現畫面有水樽,於社交網狂鬧製作唔認真!

大批網友今日於社交網轉載結局其中一幕,John C. Bradley飾演角色「Samwell Tarly」腳後有個膠水樽,完全唔切合劇集背景而且好顯眼,唔少網友都話對製作單位好失望,有人留言表示:「兩個星期前有個咖啡杯,而家又有水樽,真係難以置信佢哋再次犯同一錯誤!」HBO兩星期前曾就咖啡杯穿崩事件致歉,亦有即時執走個咖啡杯,相信日內會再就水樽作出回應。

至於劇集粉絲唔止鬧爆穿崩位,更多人批評今季劇情接連送「驚喜」,角色轉變與之前7季唔多銜接,之前更有過百萬人聯署,要求HBO重拍第8季,唔容許神劇爛尾!