Ana R.囡囡學普通話　教細佬點講早晨

名模Ana R.出席高爾夫球活動，問到Ana識唔識打高爾夫球？佢話自己協調唔到，但都想畀一對仔女學，因為自己細個冇乜機會，希望佢哋可以學習唔同嘅運動，等佢哋有多啲經驗，識得同人交際。佢透露囡囡Maya依家學緊跆拳道：「佢依家得四歲左右，年紀比較細， 好難搵到適合嘅班畀佢。而個仔就啱啱識得行，所以冇乜運動啱佢。」Ana又話Maya學緊普通話，會教細佬點講：「佢識講早晨同你好，又會每日教我講，有時唔識嘅字會叫我Google。」佢又話Maya第時想做醫生：「佢話好鍾意Baby，我聽到佢咁講都好驚訝。」

Ana表示現時兼職做模特兒工作，平時會接送一對仔女返學放學，亦會預備午餐。講到減肥計劃，佢話終於成功減到四磅：「因為仔仔瞓得好少，搞到我都冇覺好瞓，同埋佢都算係大隻BB，所以我都減得好辛苦。」另外，佢又話知道好友樂基兒生咗BB，有喺社交網恭喜佢，仲話身邊有好多BB陸續出世。