紅館開騷玩除衫！林宥嘉晒三種語言

台灣歌手林宥嘉（Yoga）的一連三場紅館騷「林宥嘉idol 世界巡迴演唱會」今晚開鑼，獲許廷鏗、周柏豪、閻奕格現身撐場。身穿紫藍色西裝套裝的Yoga孭住結他「凌空」霸氣登場，全場Fans隨即尖叫！他自彈自唱出《一點點》，其後吊台慢慢下降，Yoga接着唱出《請說》、《飄》、《讓世界毀滅》，唱至《讓》時他除下紫藍色西裝外套，雖然入面是長就黑色恤衫，但Fans依舊「收貨」尖叫起哄！

騷前表示會用廣東話貼地同Fans溝通的Yoga，今晚再次大騷語言天分，他說：「Hello！我係林宥嘉！你哋咁興奮呢，我哋輕鬆啲好唔好？想用廣東話同你哋講嘢，希望你哋聽得明！歡迎你哋嚟到idol世界演唱會，呢個演唱會唔簡單，我哋花咗好多心機、時間，喺2018年，我哋出咗idol呢個演唱會之後，好多嘢都唔同咗，希望大家重新睇到林宥嘉。」續指有好多人都好鍾意今次演唱會，甚至有Artist會做參考，變成他們演唱會的開頭，令Yoga非常驕傲：「呢種形象係前所未有，我想你哋同我哋一起驕傲，點解呢？因為我哋最初去思考呢個演唱會點做，有兩個場景一直陪住我哋，一個就係台北小巨蛋，一個就係香港紅館。」此話一出再令全場Fans陷入瘋狂狀態，Yoga突然用普通話笑說：「廣東話我講得太慢，麻煩媒體剪得時候剪快一啲！」十分爆笑！最後他以英文謂：「Please enjoy every seconds, because this is your concert, Hong Kong！」說畢便唱出《自然醒》。