盧巧音開騷差啲仆　唔講嘢齋唱有原因

歌手盧巧音（Candy）在旺角麥花臣場館舉行一連兩場《盧巧音SENSE．感演唱會2019》的頭場演出，獲孫慧雪、葉文輝、張彥博到場支持。她以《露西》掀開序幕，期間分別邀得好友傅珮嘉和黃靖做嘉賓合唱，連唱廿多首歌都未有說話。來到Encore環節，聲沙沙的她終於開金口說：「見到爸爸媽媽，奶奶應該都喺度。」之後就逐一多謝合作單位，期間講到2003年的同年同日及明日（即5月24及25日）也是開騷，就是自己首個紅館個唱。之後她行去台的另一邊多謝樂手，但不慎kick一kick，她即笑言：「差啲仆......街。」最後唱出《喜歡戀愛》作結演唱會。

騷後受訪時，講到16年前的同樣日期都是開騷，Candy笑言是歌迷告訴她才知道：「佢哋影番飛尾提番我先知，如果唔係我都唔知，佢提完之後又有兩個提我，真係好巧合，好開心，好似一個紀念咁。（今次呢個騷係做到自己想做嘅嘢？）係呀，始終每隻歌都係自己揀，台、衫都係自己控制之內。」講到今晚全晚都沒有講嘢，她笑言：「唔畀講嘢，想營造氣氛順住落，歌同歌之間緊接啲，但就辛苦啲，冇得畀我抖或講嘢，但ok嘅。（唱到把聲沙沙哋？）係呀，依家講嘢都係。（但仲有聽晚？）係呀，所以做埋訪問之後就唔講嘢住。」

講到父母及奶奶都撐場，Candy開心表示：「係呀，兩家人都嚟咗。（樂隊Kolor主音老公Sammy冇嚟？）係呀，佢要喺內地開騷，今晚綵排，聽晚做騷。」問到想何時再在紅館開騷？她表示：「唔知啊，都冇乜所謂，冇都冇乜所謂，香港都仲有好多場地，不過都因為呢個騷諗咗下個點玩。（幾時再開騷？）梗係希望下年啦，但啲嘢未必咁順心，隨緣。」另外，講到日前出席組合Soler成員大孖Julio的婚禮，她表示：「係呀，開心事。（唔多圈中人出席？） 我同我先生係其中兩位，係一個好簡單好開心嘅婚禮。」