小籠包婚姻愛足31年 張德蘭老公堅拒誘惑

2019年05月27日 16:32
東網電視
更多新聞短片
張德蘭同楊偉誠結婚31年!

資深歌手張德蘭跟西九戲曲中心顧問小組主席楊偉誠結婚31年,日前在周年結婚慶祝宴上,楊偉誠剖白深愛德蘭之因:「我哋拍咗13年拖先結婚,啱啱認識德蘭時,佢得16歲,我當時喺無綫做助理編導工作,被人視為冇前途,加上性格火爆,冇人相信我會事業有成,而且會對德蘭好,惟得佢獨排眾議,對我投以信任票,所以我一生都愛佢。」

每天追求太太

在德蘭心目中,老公既努力又好學,對她十分好,夫妻相處31年,一直過得很開心。楊偉誠以「小籠包」理論形容兩人相處之道:「婚姻就好似食小籠包,一定要小心經營,依家我每天都依然追求佢,好似小籠包,皮薄,但裏面又燙,兩個人雖然愛對方,但相處係另一回事,一唔小心,好易將皮整爛。」德蘭完全同意丈夫意見:「每個人都有優缺點,要學會欣賞對方嘅優點,包容對方嘅缺點,呢啲先係夫妻相處之道。」

無王管「偷食」

結婚多年,夫婦二人堅拒誘惑,楊偉誠笑言:「我係絶緣體。只要自己唔想過電,人哋點樣都入唔到你嘅心,我同德蘭有共同信仰,大家都尊重婚姻承諾。」每個人都想過自由的生活,他也不例外,還笑德蘭也似「嫦娥」日哦夜哦:「但係有一次,佢獨自飛去加拿大登台,一去十幾日,頭一、兩日我無王管,一口氣將屋企啲薯片、公仔麵攞晒出嚟食,半夜三更又唔瞓,開心到不得了。但係自由嘅快樂感覺只維持咗兩、三日,日子一長,打電話又搵唔到佢,我竟然覺得好寂寞,好唔慣。直至佢返港,一見到佢,一天都光晒!從此非常珍惜有佢相伴嘅時光。」

環遊世界

為慶祝結婚周年紀念,夫婦倆每年都會出外旅行,今年也不例外,他們已定六月赴巴黎及倫敦,八月份到北京,九月份飛土耳其,盡情享受二人世界。