同李司棋鬥足幾十年　黃韻詩重現江湖

「大契」李司棋於社交網十分活躍，今日佢喺網上晒出與相識多年嘅好友聚會，呢班就係舊日麗的映聲（1973年改名麗的電視）演員訓練班嘅好拍檔喇！

合照中見到謝月美、張偉盈、鍾楚蓮和黃韻詩，當中嘅亮點莫過於退出幕前嘅黃韻詩，本身IQ高、轉數快嘅黃韻詩憑住生鬼口才加出色演技，令觀眾留下深刻印象，佢拍嘅電影《92黑玫瑰對黑玫瑰》飾演艷芬、《賭俠2之上海灘賭聖》飾演川島芳子同電視劇《執到寶》飾演阿琴都成為香港人嘅集體回憶、觀眾心目中嘅經典作品。而1980年劇集《山水有相逢》，李司棋飾演嘅「梅妹」同黃韻詩飾演嘅「梅劍仙」，兩師姊妹為咗情同利反面，鬥足幾十年，對白精警、演技出色，成為神劇！

李司棋曾表示每年都會相約已移居加拿大嘅黃韻詩飲茶見面，曾多次邀約對方拍戲，不過黃韻詩樂於自在，同老公周圍去旅行，所以唔會再復出。好多網民話見到佢哋，舊日回憶即時湧現。