沖定茶咁貼心？鄧萃雯識破陳錦鴻陰謀

藝人鄧萃雯（雯女）與陳錦鴻合作ViuTV新劇《婚內情》，踏入結局周，引發多角風波。鄧萃雯、陳錦鴻在劇中日對夜對培養默契，鄧萃雯大讚陳錦鴻貼心，會沖定茶等她埋位，不過被她識破陰謀：「因為錦鴻好養生，會自備茶水飲，只要我哋同場就會自動自覺分一杯畀我，初時我都覺好Sweet，後來就知原來我哋要拍鬧交戲，每次拍唔開心場口都會有茶水飲，原來佢係一啖砂糖一啖屎，畀杯茶我氹吓我先。」

戲外雯女不但叫錦鴻做「老公」，又當街打情罵俏鬧錦鴻阻住她落車，場面搞笑：「我哋因為入咗角色，所以平時語氣、對白都係好寫實、好自然㗎啦，不過甩咗個角色就唔會叫佢老公啦。（佢話你同林德信大把溫馨戲拍？）佢驚我講佢嘛，佢不知幾多拍拖戲，你有冇發現佢同每個女仔拍都有唔同節奏，小跳步嗰啲出晒黎，淨係返到屋企對住我先死口死面，所以先成日借林德信嚟分散視線。」