頂巨肚撐老公　胡杏兒生B前最後一「露」

藝人胡杏兒2017年為老公李乘德（Phil）誕下囝囝Brendan，依家又佗住第二胎，下個月就到預產期嘅佢，一早就減產養胎，得閒又Upload吓懷孕日記，隨時生得嘅佢為生B做足準備，仲默默頂巨肚撐老公添～

點解咁講？因為杏兒嘅好友就喺社交網上載片段，見到杏兒拎住咪企喺Phil身邊，以女主人嘅身份現身老公喺中環開設嘅餐廳，話今次係佢生之前最後一晚出現喺餐廳，仲話：「咁我一定要撐我老公啦！」話音未落就已經博得全場掌聲兼歡呼，Phil就即刻笑到見牙唔見眼，梗係啦，有個咁錫自己嘅老婆喎，真係興奮都嚟唔切！睇嚟下個月BB出世，Phil一定要好好慰勞吓老婆喇～

Phil再喺社交網公布，話杏兒今胎係佗仔呀，真係恭喜晒！