郭偉亮認以前講大話：驚到成日標冷汗

歌手劉美君及郭偉亮（Eric） 以嘉賓身份到九龍灣出席ViuTV遊戲節目《估你唔到》，Eric表示節目內要估人職業，自己向來不以貌取人：「諗住靠劉美君，不嬲聽佢講，佢好有威嚴。（佢話成日畀人呃，預咗估唔到。）咁啲禮物凍過水喇！（你又有冇成日畀人呃？）冇。（呃人多？）唔……以前小學成日講大話，父母打到我飛起都改唔到，去到刷咗牙未都要講大話，已經變咗習慣，但唔知點解去到中一突然醒咗，可能賀爾蒙問題，身體機能唔同咗，變聲之餘性格都改埋，其實嗰排成日驚畀阿媽拆穿，成日標冷汗，依家比起以前講少咗好多（大話）喇！」